RUS
SMARTNEWS.KZ басылымының хабарлауынша, 1 қазан күні Spectrum халықаралық мектебінде «АТОМ ДАНЫШПАНЫ» зияткерлік ойынының қорытындысы бойынша елорданың үздік жас физигі анықталды.
«Қазақстандық атом электр станциялары» ЖШС жоғары сынып оқушыларының арасында ғылымның қызықты және болашағы зор саласы: ядролық физика және атом энергетикасы туралы хабардар ету, сондай-ақ ғылым мен білім, техника мен заманауи технологияға деген қызығушылықты арттыру мақсатында көпшілікке жақсы таныс «XXI ғасыр көшбасшысы» телешоуының форматы бойынша «Атом данышпаны» іс-шарасы ұйымдастырылды. Осы бағытта елорданың ең зерделі алты оқушысы өз білімдерін сарапқа салды.
Сурет: KNPP.KZ
«АТОМ ДАНЫШПАНЫ» интеллектуалды ойынының сәтті өткеніне қуаныштымыз. Қатысушылардың дайындық деңгейі таң қалдырады. Бұл жастар арасында атом энергетикасына деген қызығушылықтың артып келе жатқанын аңғартса керек, бұл саланың болашағы сенімді қолда екеніне көз жеткіздік», - деді өз сөзінде қазылар алқасының мүшесі, «Қазақстандық атом электр станциялары» ЖШС Бас директоры Тимур Жантикин.
Сурет: smartnews.kz
ҚР Энергетика министрлігі Атом энергетикасы және өнеркәсіп департаментінің директоры Ғұмар Серғазиннің айтуынша, мұндай іс-шаралар жас өскелең ұрпақтың ғылымға деген қызығушылығын арттырып, осы саланың дамуына зор септігін тигізеді. Сондықтан, бұл интеллектуалды ойынды жыл сайын дәстүрлі түрде өткізуді жоспарлап отырмыз.
«АТОМ ДАНЫШПАНЫ» ойынына қатысу мен үшін үлкен тәжірибе болды. Мен бүгінде ядролық энергия тек радиацияға ғана емес, еліміздің жалпы болашақ дамуына да тікелей қатысы бар екеніне көз жеткіздім. Бұл мені осы саланы тереңірек зерттеуге шабыттандырды», - деп ойынға қатысушылардың бірі Жанель Науфилова өз әсерімен бөлісті.
Сурет: KNPP.KZ
Шара соңында қатысушылар ойын серіктесі «Қазатомөнеркәсіп» ҰАК» АҚ бағалы сыйлықтарымен марапатталып, бас жеңімпаз «Ядролық физика институты» РМК Астана филиалында ғылыми тағылымдамадан өтуге жолдама алды.